14th AGM 2013 Report

DELHI PAITE INNDONGTA (DPI) ANNUAL GENERAL MEETING (AGM) 2012-13 AND LAUNCH OF “GREEN ZOGAM CAMPAIGN/INITIATIVE”

Amun: Arunachal House Auditorium, Chanakyapuri, New Delhi
Ahun: 28.08.2013

Arunachal House Auditorium, Chanakyapuri, New Delhi ah nisim 28.08.2013 in Delhi Paite Inndongta (DPI) Annual General Meeting (AGM) leh DPI initiative/panlakna thak “Green Zogam Initiative/Campaign (GZI)” puankhiakna neih in om hi. Program hunseh agin toh kiton in mipi in Pu Khamkhanpau Guite laphuah “Tuan a Pupa Satsa Gam” chih la zilna leh sakna siamtak mai in kinei a, huaizoh in Pu Khamkhanpau Guite mah piina in “Mimbang Pianna Zogam Nun in Nuam” chih la kisa zuazua hi.

Session I: Business Session

Pu Biaklun Shoute, President, DPI in Welcome/Presidential Address nouneltak in genna nei a, hiai hun manpha hon musak Pathian kiang a kipahthu genkawm in mipi hong paikhawm tengteng DPI Governing Body sik-le-tang in vaidawn thu pulak hi. Aman a genna ah tutung pen kumdang a AGM te toh akibatlouhna om a, huai bel panlakna thak “Green Zogam Campaign/Initiative” puankhiakna leh pomkipna neih ding ahi chi. Tuni a Green Zogam Initiative pen 2011 kum a SSPP JHQ Delhi in “Giving Back to the Society” chi a seminar manphatak ana neih sutzopna leng ahi chi’n gen a, DPI in nidang in Stable Land-based Farming chih khawng nasep tampi ana neita ahihdan gen kawm in, DPI ichih pen innlam a omlou akihihman in nasep taktak kihih theilou a, society adia phattuam ding idea te thoh a, initiative la a innlam a pawl tuamtuamte’n maban ana sutzop ding ua piakkhiak zel ding chih ahi chi’n gen hi. DPI in Stable Land-based Farming Seminar ana nei in tu in nasep taktak pen ZEPADA khut a omta ahihdan leng gen hi.

Huaizoh in Nu Ching Lydia in siamtak mai in “Tanglai Israel te napi bang in” chih la toh mipi te awi ziahziah hi. Dr. Kamkhenthang Guite, General Secretary, DPI in Annual Report (2012-13) tomkimtak in piakna nei a, hiai hunsung a nasep tangpi a genna ah 13.11.2012 a Pratapgarh Farms a Social outing neih a, kipolhlimna hun nuamtak kinei ahihdan gen hi. Hiai hun sung in Governing Body in tutkhawmna sagih (7) vei nei ahihdan leng gen hi. Governing Body in ngaituahna tampi seng a hon puaksuah te lak ua khat Green Zogam Initiative tuni a ki-launch ding ahihdan gen hi.

Pu H. Chinzason in Annual Financial Report piakna nei a, 2012-13 sung in sum neihsa Rs.43,808/- hi a, hiai hunsung a muhbeh toh gawm in Rs.1,39,297/- hi a, Rs.1,20,383/- zatkhiak nung in Rs.18,914/- khut ah omlel hidan in report hi.  Finance Report zoh in Pu Biaklun Shoute piina toh member paikhawmte’n Finance Report namkipna leh “Green Zogam Campaign/Initiative” adopt na kinei hi. GZI pom ahih toh kiton in Nu Ching Lydia a theme song chihtheih ding khop a kituak, eimi lalui, atultheilou  “Zoukuam Damdiai” siamtak in hon sa hiauhiau a, lungsim mitkha in Zogam hing dipdip bang hong kilang dundun thei hial hi! GZI hong lohchin ngial leh Zogam nopna alehsawm-alehza a kibehlap hulhul ding chih khawng ngaihtuah in om hi! Shakespeare leh Wordsworth te khawng in le England/Scotland gam nopdan hichituk a siam in a ‘describe’ thei di uam chih in om zezen hi.

Tua zoh in 2013-14 sung a DPI makai ding telna Dr. Thangchinkhup leh Pu P. Nangkhanthang makaih in mipi paikhawm ten kinei a, huchi’n Session I zoh in om hi.

Session II-Introduction to Green Zogam

A poimoh mahmah leh i phattuampih mahmah ding uh Green Zogam toh kisai pulakna leh kikupna lungluthuaitak Session II ah kinei a, hiai hun ah Tg. Thangzasiam Paite in feltak mai in hon makaih hi. Aman a genna ah “Zoukuam Damdiai” laphuaktu in i Zo(gam) nopdan express siam sa mahmah chi a, hiai kan a i gam nopna express siam om ding gingta lou ahihdan gen hi. DPI heututen hichibang initiative hon lak uh kipahhuai asakthu leng taklang hi.

Green Zogam Campain/Initiative bang hia? Bangchibang a panlak sawm ihia chih siamnel tak in DPI Vice President Pu T.Kaithang in hon nei masa hi.

Green Zogam in a tuppen ahihleh i gam leitang ngaihnat siamna, it siamna mipi lak ah bangchi’n hong piang dia chih ahi chi’n gen a Sapte’n “A landless man has no identity” achih mah bang un gam neilou in identity kineilou chi a lei, sing-le-gua leh gamsa te it leh ngaih poimoh ding ahi chi hi. Atak a vapai a vasem theilou himah le athu a kisinsak, kitheihsiamsak, awareness kipiak hiai Green Zogam in a tup ahi chi’n gen hi.

Singtangpa nekzondan-lou vaat, gam lian pipi hal in sing-le-lou tampi susia in hiaite hong pou nawn a piching nawnna din hun sawtpi lut ahihdan gen a, nekzonna chituam dang “sustainable” deuh omthei ding hiam chihte zonkhiak Green Zogam in a tup ahi chi hi.

Aman GZI objectives te hiaibang in pulak hi:

  • Valuing & Appreciating Land
  • Green Economic Livelihood
  • Eco-friendly Settlement
  • Renewal and Renewable Energy
  • Recharging & Water Resources

Nasep dingdan toh kisai in mipi leh solkal kiang a advocacy nasep kisawm ahi chi’n gen a, Green Zogam puangzakna dia panlakna dingte anuai a bang in gen hi-

  • Environment toh kisai article gelh
  • Environment toh kisai a research papers hoih taktakte kaihkhawm a mipi theihdia puanzak
  • Environment toh kisai a radio/TV a talkshow/discussion neih ding esp. in local cable TV/channels
  • Green Campaign ana adop sa gamte success stories te sui a puanzak
  • Shifting cultivation lou nekzonna dang bang omthei chihte zonkhiak (alternative livelihood)
  • Advocacy
  • Opinion formation

Huaikhit in powerpoint presentation tungtawn in Zoudawn limlak nalh taktak toh Green Zogam Initiative poimohdan hilhchetna neih hi. I Zoudawm limlakte apat in i gam hing mahleh forest cover sah hetlou ahihdan muhtheih a, a hing pen le vuah zuk lai, a season lai ahihziak a hing maimai hia chih dotna omthei ahihdan Pu T.Kaithang in gen hi. Tuma zek a Uttarakhand a tragedy pen unplanned develpment-lampi leh inn khawng ut dandan a a kilam ziak, lei kaikhawmtu ding singkung a omlouh ziak ahi chi’n, ei gam ah leng unplanned development tam a, singkung tawm hiaihiai in i gam gamkeu/gamdai a suah mai ding lauhhuai asakthu taklang hi.

Aman a genbehna ah ei apan gamla hetlou Sikkim ah Chief Minister Pawan Chamling makaih in Sikkim Solkal in Green Initiative pan in, singkung phuk kham bikbek hi a, gansa 1 thah man Rs.5 lakh liausak, sing 1 phuk in sing 20 a suan ding chih ahi chi. Ban ah, State Solkal in tourism naktak in encourage a, a State population 6 lakhs lel himahleh kumkhat a tourist 6 lakhs khawng in Sikkim va veh zou ahihdan gen a, tuailaite mundang a paikhe lou in tourist guide khawng in nekmu uh chi hi.

Khatvei thu in mi nekzonna kikhekpah theilou ding a, hun la ding. Green Zogam pen “Every journey begins with a single step” chihdan in a kalbi masa, a step masa ahi chi hi. Green Zogam adia panlakna din sum neihsa a omkei a, sum tellou in bangtan i paithei/paizou dia chi in kisinsakna/awareness lam ah pai ding, internet, social media, facebook, print leh electronic media tungtawn a education/awareness kipiak ding, Green Zogam in nekzonna “sustainable” zo kisinsakna ah panlak sawm ahihdan gen hi. Environment/Green Zogam toh kisai a article/thugelh kideih mahmah ahihdan gen in huchibang a contribute thei dite’n This e-mail address is being protected from spambots. You need JavaScript enabled to view it ah khaktheih gige ding ahihdan gen hi.

Green Zogam concept chiangtak a Pu T.Kaithang in a gen zoh in Pu N.Sonzalian, IFS, Faculty, Forest Research Institute, Dehradun in thugenna manphatak nei hi. Aman a genna ah i tenna gam uh vuahtui leh nisa kidaihna gam ahihman in kihampha mahmah ahihdan gen a, i gam amah omom in omsak le hing dipdip pah ding chi hi. Tuni chiang in i gam pen keu hiaihiai a forest cover kiam mahmah chi hi. Bangziak a i gam keu gawp ahia?

  • I lou neihdan uh shifting cultivation ziak in. Nidang in mi tawm a buh khamkhop muzou gige uh. Louvat nase mun kum 10 nung bang in vatkik nawn pan uh. Huai sung in sing-le-gua nana pou man in , lei leng hoihkik man. Tuchiang in kum 5 khawng a louneihna sa vat kiik ngai, buh piangkhia kiam/low productivity tun
  • Loumun kumteng a khek in gammang tampi susia
  • “Lou vaat tou zel inla zawng dedeuh in” chihna toh kibangta
  • Global warming in i gam hon awl/hawi tuanlou.
  • Gammang a sing-le-gua te tamtak in nekmuh nadi’n zang. Gamsung hing dipdip dinglai naktakin hihbuai
  • Duh-amna/Greed ziak in nekding tasam hetlou napi a pung etlahna a mi neizou pipite’n sum dawnna dia sing-le-gua satsak

Ahihleh bang lohta ding? Amasa in awareness poimoh. Gammang poimohna mipite theihsiamsak ngai-

  • Gammang in carbondioxide hipmang a, oxygen khahkhia in mihing adin poimoh mahmah.
  • Gammang a sing-le-gua omleh tui tamsak
  • Gammang a omleh vasa leh ganhing om
  • Gammang omna ah huih a ninneng/dust particle omlou.
  • Gammang in khua votsak

“Zou huihkhi siang” chia la a i saksak te a taktak a i deihleh gammang poimoh ahi chi.

Anihna ah, louneihna nekzonna dia tak nawnlou ahihleh nekzonna dang bangbang omthei? Nekzonna khek ngaita. Bang in?

  • Horticulture-theigah leh huanhai. Gammang bitzo ding, amun kisuansuan ngailou. Louvat sang a tam muzo ding. Himachal Pradesh khawng ah apple orchard neite hausathei mahmah uh. “Louvat tawpsan inla nekding mu veve in”.
  • Terrace cultivation-Luipang khawng a tui zawllut theihna munte ah tuilou bawl ding
  • Floriculture-Pak chiin ding. Mizoram bang ah nekzonna a zang pawl omta.
  • Pisciculture/nga khoina-Manipur te nga nemi ihihman un met mahmah ding
  • Apiculture/khuai khoina-additional income muhtheihna
  • Puankhui, puangat, mansonry, carpentry, etc
  • Nekzondan ah “diversification” kipoimoh. Hihna lamlam kizuih huthut louh ding. “Paite ki-engsawn” chih i loh zel ding uh.

Section 18 of Wildlife Protection Act nuai ah i gam sung Kaihlam Tang ah “Kailam Wildlife Sanctuary” bawl hiding a, final notification suaknai chetlou ahihna heutupan mipite theihdin puangkhia. Ahong lohchin a tulel leh khangsawn te adia gou manpha ahihngei gintak huai.

Heutupa thugenna zoh in Nu Ching Lydia in “Buh-al Khuang e” chihla siamtak mai in hon awi nawn ngiahngiah a, mipite bil taisak mahmah ban ah kikhopna theme toh a lasak te kituak thei mahmah hi.

Panel Discussion

Green Zogam panelists Pute Khatchin Langel, Vumlunmang Vualnam , IAS  leh N.Sonzalian, IFS makaih in panel discussion nuamtak kinei nawn. Pu Khatchin Langel in hon pii a, discussion hon pan hi. Aman a genna ah Ministry of Environment & Forests in forest cover ngaipoimoh in Green India Program pankhia chi. Aman i gam a water recharge poimoh ahihdan gen a, solkal policy rainwater harvesting, watershed management, etc State Government tungtawn a sepkhiakte pibawl hoih sakthu gen.

Panelist Pu Vumlunmang Vualnam in powerpoint presentation tungtawn in Green Zogam toh kisai ngaihdan kupna nei a, aman Zogam i chih pen uh i tenna mun teng uh himai a, Delhi ale i tenna teng uh Zogam himai ahi chi hi. Aman a genna ah niin/garbage huat di, niin buaipih di ahi chi. Eimite’n niin kihotaktak nailou ahi chi a, tuni in Lamka ah niin kibuaipihta, nidang chia Thanlon, Singngat khawng ah kibuaipih ding ahi chikhawm in GZI in “Niin Huatdan” campaign ni chi. A experience a genna ah mi’n, “Sapgam bangchituk a siang a?” chih adot chiang un hichi’n dawng zel chi, “Sapgam ah a kholak uh ei innsung bang a siang, a innsung uh ei lupna tung bang a siang”. Thil lei tawm ding hileh niin leng kihau lou mai ding ahi chi.

GZI in Green Award/Cleanliness Award patkhiak hoih asakthu gen a, hiai din sum kithoh a Fund khat bawlkhiak hoih asakthu gen.  Amau Pearson khua a ana panta uh ahihdan gen. Aman Lamka a private school te toh pangkhawm a, GZI initiative ah amau pan hon la le uh phattuam mahmah ding chi hi. Forest/Horticulture Department ten singnou hon pethei ding ua, Autonomous District Council (ADC) te bang in leng hihtheih nei ding uh ahihdan gen. Bureau of Energy Efficiency (BEE) te’n electronic van te a star rating a piak dan un GZI inle school te kiang ah Certificate piaktheih ding chi’n ngaihdan sung hi. School naupang te toh talks neih leh essay competition khawng sai in naupangte lak ah awareness pe mahmah ding ahihdan gen.

Q&A Session

Mipite lak a dotnop neite’n dotna hun kihong a, panelist ten dotnate dawng zel uhi.  

Q (Vumsuan Naulak): Misiamte suidan in mihingte chidamna dia urban leh rural area a forest cover bangchituk a sah poimoh ahia?

Sonzalian (SZL): Huchidan study chet om din ka gingta kei. Himahleh a tangpi in sing-le-lou a tamna ah dust particle omlou a, breathing-related disease tawm.   

Q (Chinsum Naulak): Innlam a ekbuk leh tuikul/well nai chikchik a kitoukhawm te bangchituk a damtheihna a khoihpha dia? Tuinek siangthou taktak ding hiam?

SZL: Tuikul leh ekbuk metre 3 beek in kigamla leh chih ahi a, himahleh scientific basis bangmah omlou, study bangmah kibawllou. Lamka ah drainage system omlou a, poimoh mahmah.

Q (Khamkhanpau): Niin bawm bangzah neih ngai di ahia?

Vumlunmang (VLM): Niinbawm kha 3/group 3 beek in khenthei le:

1.    A muattheih pah dingte. Munkuak khawng a paih a ana muat thei maite.
2.    A haltum theih pawl
3.    Pliers, thil hiam kisukliam theihna te

Garbage management poimoh.

SZL: e-waste, electronic van te koihtuam hileh

Q (H. Chinzason): Innlam a singnou suan din bang a hoihpen dia?

SZL: Tulai in forestry scientist leh ecologist ten indigenous species chiin di chi uh. Vong sing bang innlam ah hoih mahmah. Haichi, income-generating potential neite, income supplement theite ching tam le.

Q (Thangchinlian): Tuma a Lamka a DPI in seminar i sai uh a khonung a bohzuina om hia? Forest ten sing suan di hon piak chiang ua a gah omlou tata hon pia ua, sing agah omte hon pe le uh phattuam zolou ding hia, eg. Hai/mango?

SZL: Theigah kha horticulture department lamte saideuh ahi. Forest Department lamte’n bel  agah a suang leh suanglou lam sang a carbondioxide a hiip hia chih khawng ki-en zaw. Revenue sang a environmental value ki-en.

DPI Seminar follow-up toh kisai Pu Biaklun Shoute, President, DPI in hichi’n dawng: Tea paihatlou a, coffee bel Tangpizawl ah kichiing. Coffee Board in leng recognize ta. Hiaipen ZEPADA khut a piakkhiak ahi. Spices Office leng Hebron Veng, New Lamka ah kihongta. A buaihuai pen ahihleh marketing problem hilai. I product te bangchi market ding chih.

Q&A Session zoh in Pu Vumlunmang Vualnam in panel discussion summing up nei a, aman tunia hong paikhawm te point 1 beek toh kiiksawm chiat ni chi a, electric zatlouh chia on/off toh kisai maimai leng zilding kinei lai chi hi.

Panel Discussion zoh ahih toh kiton in Election Result puanna Dr. Thangchinkhup Guite, Returning Officer in nei a, anuai ate 2013-14 sung a DPI makaidia telching ahi uh:

1.    Pu Biaklun Shoute
2.    Pu H. Chinzason
3.    Dr. Kamkhenthang Guite
4.    Pu Vumlunmang Vualnam
5.    Pu T.Kaithang
6.    Pu Khamkhanpau Guite
7.    Pu K. Biakkhanmang

Telching thak a omte Pathian kiang a thumsakna Upa Chinsum Naulak in nei a, Vote of Thanks siamtak mai a Pu N. Vumsuan in hon gen ziahziah khit in closing prayer Upa Thianzakham in nei in huchi’n programme zoh ahita.