13th AGM 2012 Report

DPI KUMSIM KIKHOP, A 13VEINA ZAT ZAWH HITA

Amun: Arunachal House, Chanakyapuri, New Delhi
Ani:  Kiginni, 14 July 2012.
Ahun:  2.30PM (Sun-an nekzawh) apan

Inndongta a kipua Zomi nam bangzahhiamte laka khat, Paite tribe sunga kikhaikhawmna poimawh mahmah DELHI PAITE INNDONGTA (a tom in, DPI) Annual General Meeting & Web-site honna, kisakkholhna pai bangin July 14, 2012 (Kiginni)  nitaklam dak 2.30 apan Arunachal House, Chanakyapuri, New Delhi ah hunseh zat ahi. Programme a tannei tuamtuam zogam.com/ zogamonline.com etc a taklat a omte lak ah, Topical discussion hun a moderator di’a guan DPI Asst. Treasurer, Pu Khatchin Langel cih louh (amah mun Cdr Lalsuonglien Tonsing in luahtou), tanneite pangkim thei in programme manpha tak na zangkhawm uhi.

DPI President lenlel leh Kikhopna pitu, Pu Biaklun Shoute in Pasian kianga kipahthu gen masapen kawm in paikhawm mipi, Arunachal House dining hall a kivaak vahsa hall sunga tute, DPI Executive Committee sik-le-tang in vaidawnna nei a, ama’n, “I vai khempeuh ah Pasian lianpen gige hen” ci hi. Tua pen hun honna thumna Pastor Nenglian apan in zui. Pastor Lian in Sam 125 simkhia in Toupa muanpen gige diing ahihdan kam khat kam nih gen in thumna hun zang hi.

Aban item, web-site honna hun. DPI Asst. General Secretary Pu Dr Kamkhenthang Guite makaih in. Pu Khenpi in a genna ah, “DPI pen website min hingal mai (domain name) di’n deihhuai mahleh, midang in na zang khinta uh ahihman in, lemthei talou hi. DPI tawh kinai theipen, a awngthawl lai khat ‘inndongta’ hon kici ahi. I site pen active taka houlimna dia ngim hilou in documentary depository deuh dia ngim ahi. Document koih a omtate banah a koih behtu khat in pan sawm ciat ni maw” ci hi. DPI website hon theih dia om a lungtun thu, leh ana buatsaihtu Pu Siam Naulak leh a seppihte tunga kipahthu a gen zawh in a hongtu di’a seh DPI Senior member Pu Ngullam hun pesawn a; Pu Ngullam in DPI phattuamna leh DPI tungtawn a kiseemkhia thupi a sak khenkhat taklang in, tuhun a DPI phungvuh thei zel a i om kipahhuai a sakdan gen kawm in www.inndongta.org hongkhe ngiah hi. Website ah DPI Registration Certificate, MOA/ RR, Members list, Annual Reports, Audited statement, DPI (+ZEPADA) inntekna a sai LAMKA ah Seminar nihvei, Delhi ah NE Colours, 2011; Pratapgarh Outing, 2010, Audited statements, Reports, leh adangdang tuang.

Mipi’n gam ngaihla “Mimbang Ka Pianna”, lapite- Upa Khamkhanpau leh Pu Biakkhanmang makaih in kisakhawm a, tua khit in Kikhopna pitu Pu Biaklun in a seppih DPI makaite ding sak in mellahna nei. Delhi Paite Inndongta Governing Body (2011-2012):

President: Pu Biaklun Shoute
Vice President: Upa T Kaithang
General Secretary: Pu Vumsuan Naulak
Asst. General Secretary: Pu Dr Kamkhenthang Guite
Treasurer: Pu H Chinzason
Assistant Treasurer: Pu Khatchin Langel
Members:
Upa Khankhanpau Guite
Pu Cdr Lalsuonglien Tonsing
Pu D Kamkhanmang
Pu Vumlunmang Vualnam, IAS
Pu Biakkhanmang Guite
Advisers:
Pu V Dongzathang, IRS (Retired)
Pu Haukhum Hauzel, IAS (Retired)

Topical discussion “Delhi khawpi a omte’n i Nam adia i hihtheihte” cih thu-kikupna in zui. Moderator Cdr Lalsuonglien Tonsing in ‘sing omlouhna a gua’ cih banga hong dingkhia ahihdan gen kawm in, a pankhawmpih (panelist)te Pu V Vumlunmang leh Upa T Kaithang mellahna nei. Moderator-pu in hun saulou hon laakzawh in Pu Vumlunmang hun pe masapen hi. Huci’n, thupi kipia meilet kawm in, khat khit khat in hun zatna paitou. Houlimna a thu kigen tangpite, Kilhkhawm ah.

Kikhopna pitu, Pu Biaklun Shoute in hun honla zom. Ngaihdan genkhia lawi-upa tuamtuamte tunga kipahthu genkawm in khantouhna diing lam thilte ngaihtuah leh seemzui i hih ciat diing ahi, ci. SSPP JHQ Delhi in zong giving back to the society cih thupi zanga program ana zat ngeitak banah, tu August 4 ci’a THE YEAR THAT COUNTS cih thupi pansan a Delhi hongpaithak member-te vaidawnna neih zuaizuai sawm ahi, cih genkhia. Program pat zekai zek ziaka hun save-na dia Ice-cream innkong a nek diing kici pen, hall sunga hawm hi diing cih (leh nungakte’n hon hawm ngal diing uh ahihdan) puang kawm in Lasiam Lia Muanching sam hi. Lia Muanching in ‘ITNA DAMTUI’ (Javed Kham phuah) gam-ngaihla lungkuaitak khat honsa. Muanching zawh in, Pa Biakkhanmang in ‘VANGSEL ZOLEI’ (V Siampu phuah) la hon-awi diaidiai; tua pen Ms Sylvia Sanmawi sak, special request song-  “Country Road” in zui hi. Nuam himai.

Hun nihna (Session – II): Business Session ah kiluttou. Kikhopna pitu in hun apiak dungzui in Annual report leh Audit report piakna, General Secretary Pu Vumsuan leh Fin Secretary/ Treasurer Pu H Chinzason te’n hun honla ngal uh. Amau, a report uh mimal simtheih di’n mipi lak ah copy hawm uhi. Secretary Report in a taklatna ah AGM 12na (01.10.2011/ Mizoram House, Vasant Vihar, New Delhi) neih ni a teelcing  mi 7 + sehthawh member 4 te, banah Advisers Pu V Dongzathang leh Pu Haukhum Hauzel te telna DPI Governing Body in tu term pailel sung in tutkhawmna, 7-vei nei. DPI membership list in ataklat dan in, DPI ah member 102 omlel. February 21, 2012 in Pu V Langkhanpau (leh a ji), Chairman, ADC CCpur leh Pu Gouzamang Guite, Executive Member, ADC CCpur te houlimpihna an nekhawm in nei. Pratapgarh Outing 2010 leh Northeast Colours 2011 te gel combine a DVD kibawl a sum kimute DPI account ah guanlut ahih banah, 12th DPI AGM a thupukna kila khat DPI website bawlkhiak ahi. 2010-11 sung in DPI member Pu H Chinlianthang in 05.12.2011 in hon mualliam san.

Hiai hun ah Finance Secretary/ Treasurer Pu Chinzason in, DPI Membership Fee Rs. 25/- hisek pen Rs. 30/- hita diing leh Annual Fee Rs. 5 apan Rs. 10 kalsak diing thu honvawk a, AGM 2012 a paikhawm mipite’n lem saciat in hiai rate bikhiah thak, term nawn apan zat lemsak ahi. Sumzekna tawh kisai audited Balance Sheet (2011-2012): -

Opening Balance: Rs 53, 638/-
Receipt & Income (Including ‘bank interest’ Rs 2,364/-): 2, 42, 500/-
Total Income: Rs 2, 96,138/-
Expenditure & Payment: Rs 2, 52, 330/-
Cash Balance: Rs 43, 808/- [as on 31.3.2012].

DPI, 2012-2013 vaipaw diing mi 7 teelna, vaisaitute Pu V Ginthanlian, Pu B. Thawng Sian Dong leh Pu V Jamthianmung te’n feltak in honsai uh. Kiteelna saite vote sim sung in ‘TOUPA I ZUAN DIING UH (T Pumkhothang phuah)’ sakkhawmna round 2 ½ mipi’n kinei. Banah, Np. Nenem Guite in ‘KA LAWM HOIHPEN’ (V Biaklal phuah) la siamtakin honsa. Lia Muanching in zong gam ngaihla ‘ZOGAM NUAM’ (a pa T.S. Mangboi phuah) siamtak mah in honsa hi. Hiai hun-awng sung, kikhopna pitu lem sakna tawh ngaihdan gen khenkhiakna zutzop ahi (Kilhkhawm sutzopna ah).

Member tengteng candidate hihna, DPI, 2012-13 vaipaw diing teelna, a saite’n result man sakta uh; candidate mi 100 val zekte lak apan anuai-ate secret ballot khiak tungtawn in teelcing heutu thakte hiaite hi uhi: Pu Biaklun Shoute, Upa T Kaithang, Pu H Chinzason, Pu Dr Kamkhenthang Guite, Pu Vumsuan Naulak, Pu V Vumlunmang leh Cdr Lalsuonglien Tonsing. Kiteelna saite’n a cial dungzui un teelcing a om heutute thumsakna Rev V Songkhothang (Retd Pastor) in honnei. A zawhna kuikui ah DPI Vice-Chairman Upa T Kaithang in vote of thanks leh hunkhakna phui honsam, maitai ciat in kikhen ahi.  TOUPA eidi’n hoihna e! Lungdam.

Gelhluttu: Upa Chinsum
14.07.2012

<SPACE A LAKLAWH SIM A, LAGELH KHAT AW>

TOUPA I ZUAN DING UH
T. Pumkhothang

Toupa na tate lai ah, kawlni suah sim in,
Huhamna leh siatna in ka gam uh a luah zou;
Ki-itte, kilaizomte dougal a suak zouta,
Ki-itna’n mun a nei nawnta lou.

I thou ding aw I zuan ding Toupa I zuan ding uh,
I gam zong Toupa’n a hon itlai;
Bang hang a I Toupa mel liahtu I hih lailai,
Kisik in Toupa I zuan ding uh.

Khelh vang in aw sen momnou sanggah a tam ngei.
A ithuai a naupangte na ngawn in zong a thuak;
A poi in a mulkimhuai tulai in nuntakna,
I Toupa a mel siatna ahi.

Zuang hong thou un tuun leh zua chiin leh tuaite aw,
Kisathei in om kei ni kingaihniam a hunta;
Kisik a I sul hei leh ngaihdamna I tang ding,
A liam ma’n I zuan meng ding uhi.


Kilhkhawm

DPI Annual General Meeting, 2012 & Web-site honna program neih hun a houlimna
“Delhi khawpi a omte’n i Nam adia i hihtheihte”

Pu V Vumlunmang: 1974 kum, Delhi ah ka naupan lai a ka na om khaklai a thil omdan leh tuhun nasatak in a kikhekta. I nam masawnna athupi mahmah hi. Tuni a i thupi i genkhawm ciangin mimal ciat in i hih pah theihte awlmawh masak hoih hia, ahihkeileh ei buaipih khak bat ngellouh awlmawhhuai dana lang thilte - koilam awlmawh masa diing, koilam a hunpe diing I hia cih te ngaihsun kawm in houlim le’ng. Tu’n mipi lam apan….

Pastor V Nenglian: Saptuam a seemtu bangzahhiam kipawlkhawmte’n, khateng in sum thawhkhawm leh tua sumte manphataka zat cih bang na neithei ung. Huci ahihleh, Siamnanei leh dinmun sangpipi nei Delhi a omte kikupkhawm a, innlamte haksatna dawnzaangna di’a Financial Institution khat patdan om theilou diing adiam?

Upa T Kaithang: Pastor Nenglian gen pompih ing, America ah zong mission worker te adi’n hibang kitunding-tuahna institution bawl uhi. Mark Twain in, ‘Public office is private graft’ ana cih, I gam dinmun tawh kituak. Public office a dinmun khat valet ziaka hauhsak sawm om ana hihleh ngaihtuah khial, hihkhial hi diing hi. I kisinsakna uah Education of the head (laisiamna lam), the heart (biakna lam), and the hand (khut nasep) a tonkhawm diing deihhuai sa ing. Mi’n siamna khat hon neih ci’a nasep ngai nawnlou sakna, a.k.l. sahkhua ngaihnepna cihte lungtang kikheklou siamna ahi. Lungtang kikhek siamna in biakna limsak in khut nasep zarbawl lai diing hi, tua i gen te tellou culture zaw kim zoulou deuh ahi. I minam adi’n Delhi a omte’n hih theih bang i nei a?

Pu Biaklun Shoute: Minam vai ahihcia’n ‘team’ thil ahi a, huai team ah panna i nei ciat, together we can make history. Delhi pen power centre ahi, Mumbai pen Industrialist centre ahihbang in. Delhi ah hong ki-report ua, decision zong Delhi ah kila tangpi hi. DONER ah sum tam. YPA, SSPP, DPI etc core-group kibawl in “hiai seem ni, huai seem ni” cih bang neithei le’ng bang aci di’a? Hih theih khamkham a DPI in bel land-based farming seminar leh adangdang na sai sam ahi.

Pu Haukhenpau Guite: Innlam ka pai nanung in Saikul khua ni khat ka vapha. Gam (Land) poimawhdan musuah deuhdeuh ing. Kaam kipiaksawn theih hilou, gam bel kipiaksawn theih ahi. I gam i lei i cih kua te i pesawn ua? Ahithei liaite’n i gam taisan lou a haici ciin, huai le commercial crops esk. nahtang, baal, siing leh adg.dg. kihanthawn tuak ka sa. Banah haici ciing kawm in gan bang khoi lai le’ng, expansion chance om mahmah hiveh aw. Awlmawh mimal, pawlpi makaite leh mipi palaite tawh kithuzak in pangkhawm le’ng, Zodawn a khawsa leh Zodawn apan nektawm zong Lamka lam a om tamtakte adia kitawhsuahna hong hithei ahi.

Pu Chin Thang: Delhi munpi khahsuahlou teitei di’a amun a omsate’n thathak i laak ua, laisim diing hiam sepna join diing hiam a hongpaite care & concern piak theihtawp a i na piak uh i minam adi’a i hih theih lianpen uh ahimai diam? Survival of the fittest hun ah i ding, Delhi power centre ahi cih i thei ciat. Power centre a thuneihna tawi IAS/ IPS etc tutnate luah zom thei diing mi om peuhmah le, I ma vang diing, tua di’n Delhi honglut imi-isate na brain-wash di’n na kisa le’ng i nam adia panna taktak hilou diing adiam?

Upa Thianzakham: Horticulture is the best livelihood, cih ahi. Gam kikhek nawnlou diing ahihna ah, i neihsa gam leitangte kembit in zat manphat sawm lai ni. Meh mantam ahi, huan (garden) bawldan leh huanhaite zuakkhiakdan kisinsakna (training) i kipe thei di uam? Tampi i hih zawh k’a, saupi i vasawk zawh ke-le i hihna/ phakna tantan a quality neitak a i hinciat ua ahihleh, i gam ua vaihawm zom thei di’a Toupa’n honbawl thei ahi.

Pi Dorothy Niangkhannem: Upa Kaithang gen pompih ing. Mihing, lu (head) kia khang taleh, khangdik kici theilou diing – taksa kahiang dangdang tawh a khankhawm ngai ahi. I pipute’n paidan leh innsung kivaipuakdan na nei ciat uh. Innsung a nute/ numeite’ sep diing deuh, pate/ pasal te sep diing deuh, Esk. Nupite puan-gat, ansuk, leh adg.; pasalte louvat, inn lam leh adg. Naupangte’n hih theih khomkhom a innsung a nu-le-pate hih kithuahpih. Hun sawt pai nailou apan ompih (domestic helper) neih i tawndan uah a honglutta. Ompih i neih in, neulai apan subconscious level a i septouh leh innsung a i zilkhiakte zil kha nawnlou di’n honkoih (innsung naa teng Ompihte’n seemta). Ompih neilou hinkhua’h kiik thei nawn le’ng tuh sub-conscious level a i tate’n ei, nu-el-ate apan hon zil diing uh om. Tuate ngaihtuah tuak I sa hia?

Innlam ka vaphak nanung in Lanva lui leh Tuitha lui te’n hon patausak mawk! Lanva lui, Delhi a nullah te sa neuzawta, akim-akianga mual (singkung pou singseng)te na maai zouta; gammaang a suah (nawn)na di’n hun sawt alut mah diing! Tuitha lui, nidang a siang kelkel, tua vuah hongzu, niin – buannawi! Tuban kum 20 khit cia’n i gam teentheihna ahilai de aw...!? Lemon grass ciinna, i gam a na om(ta) in hon kipaksak. Bangcidana hiai bang panthei uh hiam, cih ka dot leh a ciindan leh zuakna Internet apan ka zonkhiak uh ahi, ci’n thei-in-thei zaw-mah uhi. Hiai bangdeuh, i gam adia phatuam diing, Delhi brain a zonkhiak a innlamte kawkmuh / pass sawntheih i nei di uam?

Pu Ngullam: Carpentry ka seemkha. Tua khutsiamna pansan in Guite kual ah ka na zinmun hi. Gam bel nei hoih i hi. Gam leh tui, mihing hinna di’n poimawh ahi, tui kia hileh kihing lou diing ahi. Gam, mihing adia hinna ahihziak in la bang phuahkhum hialdan i hi. Tucia’n hausa, mahni gam hoihna lailai ‘beu zuak’ bang om, mahni gamsung a hol (meihol) hal le om. Hol halna mun a haici hoih thei nawnlou ahi. Hausate gam mawk zuak khaam thei, thuneihna tawi omlou i dia’m? A gam neitu leh a teengte mah gam hihsetu a i pan leh, atawp ci’a i gam tenna taaklou khawng diing ahi.

Pu Ginkhankam: 1967 kum, Mission Compound a skul ka kailai a ka thumna, “Toupa, vualzawlna hon pia inla, Manipur ah hon tengsak kaw’h” cih ahi. Mimal khawsuahna di’n heutupa Vumlunmang hon gen teelsiam poimawh. Delhi a om Paite-te kitam thou ahi, DPI program ah apaikhawm i tawm. Tampi paikhawm in ngaihdan hoihpipi tamseem sunkhawm hileh na ci ing. Delhi a honglut (paithak) siamsinte hinkhua etzuina ah DPI in inntek pan seem in pan i la thei dia’m?

Pu Thawngkhankhup: Mihing adia poimawhpente (i) Meivak (Light) (ii) Lampi hoih (iii) Tui (Water) leh (iv) Huanhai ciinna leh zuakkhiakna kichup ahi i cithei kha diing. Lanva luitui tawm hiaihiai, a’ lui pangte a singnou suan in vengthei diing. Tua sepkhiakna di’n solkar a a kisaipih Department te leh ei local a agency/ organization tuamtuam omte pangkhawm a sepkhiak theih law diing ahi. Hiai etzui leh sepkhiak pah ahikeileh, sea-level theilou i hi a, tui hongkaang thei; hongkaang taleh Lamka i pemsan ngai diing.

Upa Tuanmuanthang: Tuithapi khawsuak ka hi. Nidang deuhlai in Tuibuang Bethel tanpha maingal tak in zaanglou tawn in kipai sek. Tucia’n zaangloute teenna mun suak bei dekta, Tuithapi khua leh Saikul kikal tel in. Gendan dang in, i gam i cih nuamlou hiaihiai. Hucih ahihvanglak leh DELHI a-te’n Housing Society pan in gam leikhia in tua ah inn lam in, eimite teengsak le – gam leh leitang kembit banah,  imi-isate adi’a panna hoihtak ahimaikei diing maw?

Pu Hausuanthang: I topic, innlam (Manipur) kia kawksak kei le’ng ci ka hi. DPI in i omna Delhi khawpi ah information tuamtuam kaikhawm in, kemcing lai in, tua pen - innlamte hi’n Delhi mun a omte hitaleh - a poimawh nana-a zat theih di’n koih le. Tua di’n tuni a honkhiak hita DPI website bang zat manphat mahmah sawm le’ng [Information is power].

(Moderator hong kigolh zeuh, heutupa Vumlunmang hun pe-kiik hi)

Pu Vumlunmang: Horticulture hong kigenkha a, lungluthuai ka na sak mahmah ahi, suti la a vakuan bang utphial sek ka hi. Kipahhuai. I ngaihtuah zom diing ua hoihsak thil thum hon-gen le’ng –
Khatna: Sep nei in i om ciat. I sepna mun uah bangcibang hihna i nei ua? I sep penpen lunglut leh siam/ thazawh i sawm diing ahi. Seppatni (office kai diing), a tangpi in kilawphuailou sa deuhvek i bang ua, heutupa Biaklun in ahihleh Seppatni phur taka ngaak sek hi’n ka thei, a sepna-a lunglut leh kipezoutak ahihman in. Neih-le-lam lam leh gou khawlkhawmna ah, vaite hih sumkhol cih bang asiam ua, kilawmsim a kizem hong hikhe zaih i cihte bang tuh sum tampi neita bang na hisek dan uh ahi.
Nihna: Lungsim tawngtak a vaite sanga niamzaw-a kikoihna hihbei ni. Amau dangnaal banga i dangnaal louh ziak leh amau sanga tawmzaw lua hihziakin, kikoih niamzawkna i na nei hi; kamhat a zoulou, boxing phei mai... cih khawng hun paisa-a i na panlakdan le ahimaithei. Far East Countries, i mel-le-puam kibatpihte hong changkan uh tawh kiton in, eite hon paw-kaang kha uh ahi. I omna mun ciat ah i sep/ i sin pen siam mahmah (expert) leh fittest hih sawm ciat photphot le, kisimmawh/ kimuhsit cihte omthei diing ahi(nawn) kei. Panla thak ciat ni.
Thumna: Sep diing i neih tak seemkhelou a paulam (excuse) bawl tawpsanta ni. Esk di’n nu leh pa, tapa thumanglou neikha, “Hiai naupang thukhel lua a...” ci a amah tungtanga i hih diing mawhpuakna hih khelou, paulam bawl; innkuan khawzaang a thuak cih omthei ahi. Hun tamzaw piak in hia, a theizawte kianga tonpih in... ahihvengna diing zonzawk diing ahi. Excuse paikhenga lawhcingte hih sawm ciat ni.

Ngaihtuahhuai ka na sak giugiau khat hon-genlai le’ng, tuni a innlam awlmawhhuai ci’a i kikup thute, hiai khawng a khanglian leh hong khangtou diing i tate’n ei awlmawh bang in awlmawhna ahon neizom diing uam? Ei tan in houlimna a i zat, innlam thu, i tate/ tute’ khang a phawk leh ngaihsak a om kha nawnlou hetlou cih omthei ahihmanin, hiai kal zoptuah diing (kitheihsiam sak diing) zong mimal cih te’n mawhpuakna nei i hi cih mangngilh kei ni. Ka kipak.

Cdr Lalsuonglien: Kum paitate in DPI AGM ah, sepna tawh kisai buaina khenkhat ziak in, ana tel theikei mahle’ng tutung tel thei a ka om kipak mahmah ing. Awlmawh tei khat, kigentuamna, kikhentuamna nengneng, ets Bukpite, Lamzangte, Lanva gaal te, solkar naseemte, huaite beh leh adg.dg. ciin in neikei thei le uthuai ka sa. Tua nengnengte’n unau (midanglou) i hihna leh kizopna khangsak (promote) lou hi’a thei ka hi. Thu kikupna hicitan in zawh phot i sawm hi. Ngaihdan honkum tengteng leh mipi hong paikhawmte, na vek ua tung ah kipahthu k’on gen hi. DPI damsawt hen!

<Hun 2na, Sunnung lam a thugentu khenkhatte thugen>

Pastor Songkhothang: I gam, Pastor te’n bawlzou nawnlou himai ahi. Tua ahihman in, Delhi a diktatna paipihte’n Manipur lam ah hon-gen tam ngam zaw-lai le-ucin cihhuai. I gam bawlhoihna di’n DIKTATNA  ah pan thei le’ng, lamzanhuaipen di’n ka gingta. Nam makai, pawlpi tuamtuam makai i cihte heutu hih lawptawp mai hilou, micitak, diktat deuhmah hithei teitei leh deihhuai lua eivo’i. I thautawi tangvalte bang le Commander tan bek khamtheih a kibuallou hile(uh) adan hong-om diing ahi.

Upa Tualzapau: DPI kikhopnate ah abul akipan na teltou gige ing, i vaisaidan leh thilhihte uh manpha ka sa. Sumbawlna tawh kisai, Meitei nupite’n nga (fish) akhoi uh leh pung, e’n i khoi leh kiam; Mizoram a unaute’n thei (fruit) ciin, nekzonna in zang theita uh. Ei, Manipur lam a te’n zong paina diing saupi leh kikawkmuh diing tamtak nei lai hang, hanlungciam ni.

Pu John Thawmte: DPI leh ZEPADA pangkhawm in, kum 4 vel paisa a Lamka khawpi a land-based farming honsai na kipahpih law petmah ka hi. Hucibang vasai mai hilou a documentation in honzui lai, ka omna mun ah na download in tua document te tu’n le ka neilai. Mahni kia-a hih theihlouh, pawldang tawh kikawi a hih, pilhuai. DPI in a nasep leh thilhihna peuh ah tuamna riau (uniqueness) anei hi’n ka thei. Central government a ministry tuamtuam te fund sanction dan leh paidan bang compile bawl thei in, innlam tawh kituak, zat theih diing te thon tou zel thei le’ng bang aci dia?

Upa Chinsum: Tuni paikhawm mi, Arunachal House dim minmen, aphazah (number) a buailouh hoih kha diing. Khawvel a thil thupitak sepkhiak a omte mipi kipunkhawm noinoi a sep omthou mahleh, a geelkhiakna mun a mi tawmkhate kithutuahna gah bang hisek zaw ahi. Tua bangin, i minam adi’a phatuam kikum leh geelkhe di’n, tuni a paikhawm eite sithuai lou hihang. Banah, DPI website hon a omta sustain na diing tawh kisai document koih a omte leh koihtou zel diing ah pilvang zek peuhmah le’ng, huai tuh khangthakte laizilna leh khawsakna adi’a phatuam ban diing lamte piibawl, website vehtu diing mi zaw om-om lel kha diing ahi. I tuailaite’n thil sui in thutak ah dangtaak mahmah un thei ing.

Upa Khamkhanpau: Pianna gam ngaihhuai banah awlmawhhuai mah ahi. Tutung innkuan a Mizoram tawn a innlam ka vapai un muhkhiak leh theihthak tamkhop ka nei. Tuni a i kikupte manpha, aban lam ah i minam khanna diing cidamna diing awlmawh zom thei ciat di’n TOUPA’N eite hoih in honvuk hen! Gennop dangte, website mahmah ah gelhkhiak i sawm zaw diing.

14.07.2012